ഗുണ്ട് പൊട്ടിച്ചു പൊട്ടിച്ച്...

ഇക്കുറി ഇന്നസെന്റ് ശരിക്കും മരിച്ചു
ഇന്നസെന്റിന് അർബുദമാണെന്ന വാർത്ത പുറത്തുവന്ന സമയം തൊട്ട് പലവട്ടം സാമൂഹികമാധ്യമങ്ങൾ അദ്ദേഹത്തിന്റെ മരണവാർത്ത പ്രചരിപ്പിച്ചിട്ടുണ്ട്. പക്ഷേ, ഇത്തരം പ്രചാരണങ്ങളെ ഇന്നസെന്റ് വെറും തമാശയായിമാത്രമേ എപ്പോഴും കണ്ടിട്ടുള്ളൂ. ആദ്യ പിണറായിമന്ത്രിസഭ അധികാരമേൽക്കുന്ന ദിവസവും അത്തരത്തിലൊരു മരണം ഇന്നസെന്റിന് സംഭവിച്ചു. സത്യപ്രതിജ്ഞാ ദിവസത്തിന്റെ തലേന്ന് രാത്രിവരെ തൊടുപുഴയിൽ സ്വർണക്കടുവ എന്ന സിനിമയുടെ സെറ്റിൽ സജീവമായുണ്ടായിരുന്ന ഇന്നസെന്റിന്റെ മരണവാർത്ത രാഷ്ട്രീയ-സിനിമാ മേഖലയെ ഞെട്ടിച്ചു. തലങ്ങും വിലങ്ങും ഫോൺ വിളികൾ പറന്നു. ഒരുകാര്യം സത്യമാണ്. മരണവാർത്ത സാമൂഹികമാധ്യമങ്ങളിൽ പടരുമ്പോൾ, അദ്ദേഹം തൊടുപുഴ സെയ്ന്റ് മേരീസ് ആശുപത്രിയിൽ ഉണ്ട്. തിരുവനന്തപുരത്തേക്ക് പോകുന്ന വഴി പതിവുരക്തപരിശോധനയ്ക്ക് വേണ്ടിയാണ് അദ്ദേഹം ആശുപത്രിയിൽ കയറിയത്. അതും വീട്ടിൽനിന്ന് ഭാര്യ ആലീസ് വിളിച്ച് നിർബന്ധിച്ചപ്പോൾ.

ഇന്നസെന്റ് ആശുപത്രിയിലേക്ക് കയറിപ്പോകുന്നത് ആളുകൾ ശ്രദ്ധിച്ചിരുന്നു. പ്രിയനടൻ ആശുപത്രിയിൽ എത്തിയതറിഞ്ഞ് കൂടുതൽ ആളുകൾ ആശുപത്രിക്കവാടത്തിൽ തടിച്ചുകൂടി. തിരിച്ചിറങ്ങി വരുമ്പോൾ നടനെ കാണാൻ ആളുകൾ തിരക്കുകൂട്ടുമെന്നു കരുതി ആശുപത്രി അധികൃതർ മറ്റൊരു വാതിൽ വഴി ഇന്നസെന്റിനെ പുറത്തെത്തിക്കുകയും അതുവഴി അദ്ദേഹം തിരുവനന്തപുരത്തേക്ക് രക്ഷപ്പെടുകയുമായിരുന്നു. എന്നാൽ, ആശുപത്രിക്കകത്തേക്കു പോയ ഇന്നസെന്റ് തിരികെ വരുന്നില്ലെന്ന് മനസ്സിലാക്കിയ ഏതോ ഒരാൾ അദ്ദേഹം മരിച്ചതായി പ്രചരിപ്പിക്കുകയായിരുന്നു. ഇന്നസെന്റ് മരിച്ചുവെന്നും സത്യപ്രതിജ്ഞയുടെ ശോഭ കെടാതിരിക്കാർ പാർട്ടിക്കാരും ആശുപത്രിക്കാരും ചേർന്ന് വിവരം രഹസ്യമാക്കി വെച്ചിരിക്കുകയാണെന്നും വാർത്ത പരന്നു.ആസമയം തനിക്കുവന്ന ചില ഫോൺകോളുകളെക്കുറിച്ചും തമാശരൂപേണ ഇന്നസെന്റ് പലവട്ടം എഴുതുകയും പറയുകയും ചെയ്തിട്ടുണ്ട്. അന്നത്തെ സി.പി.എം. ജില്ലാ സെക്രട്ടറിയും മന്ത്രിയുമായ പി. രാജീവിന്റേതായിരുന്നു ഒരു വിളി. താൻ ഹലോ എന്നു പറഞ്ഞിട്ടും അങ്ങേത്തലക്കൽ രാജീവിന് മിണ്ടാട്ടമില്ലാതായതും, എന്തിനാ വിളിച്ചത് എന്ന് ചോദിച്ചപ്പോൾ വെറുതേ സുഖമാണോ എന്നറിയാൻ എന്നുപറഞ്ഞ് ഫോൺ കട്ടാക്കിയതും ഇന്നസെന്റ് ചിരിച്ചുകൊണ്ട് പലവട്ടം പലരോടായി പറഞ്ഞ കഥയാണ്.
രാജീവിനു ശേഷം വിളിച്ച മമ്മൂട്ടി പരിഭ്രമിച്ച വാക്കുകളിൽ സംസാരിച്ചതും ഇന്നസെന്റ് കോമഡിയാക്കിയിട്ടുണ്ട്. ''എടോ, തന്നെ വിളിക്കാനായി ഫോണെടുത്തപ്പോൾ ഞാൻ പ്രാർഥിച്ചത് താനല്ലാതെ മറ്റാരും ഈ കോൾ അറ്റൻഡ് ചെയ്യരുതേ എന്നാണ്. പടച്ചോൻ എന്റെ പ്രാർഥന കേട്ടു.'' -വിറയാർന്ന ശബ്ദത്തിൽ മമ്മൂട്ടി പറഞ്ഞൊപ്പിക്കുകയായിരുന്നുവെന്നാണ് ഇന്നസെന്റ് പറഞ്ഞത്.

സിനിമാക്കാരനിലേക്ക്
പതിമ്മൂന്നാം വയസ്സിലാണ് ഇന്നസെന്റിൽ സിനിമാമോഹം തളിർക്കുന്നത്. അതിനുനിമിത്തമായത് നടൻ സത്യനും. ഇരിങ്ങാലക്കുട ഉണ്ണായിവാര്യർ സ്മാരകമന്ദിരത്തിൽ ഒരു പരിപാടിയിൽ പങ്കെടുക്കാൻ സത്യൻ വന്നിരുന്നു. ഇന്നസെന്റ് ആദ്യമായൊരു സിനിമാനടനെ നേരിട്ടുകാണുന്നത് അന്നാണ്. സത്യനെ കാണാൻ അന്നവിടെ തടിച്ചുകൂടിയ ആളുകൾക്ക് കൈയും കണക്കുമില്ല. ഇതുകണ്ട് ഇന്നസെന്റിനൊരു മോഹം. എനിക്കും സിനിമാ നടനാകണം. എന്നെയും ആളുകൾ ശ്രദ്ധിക്കണം. പിന്നെ ഇന്നസെന്റിന്റെ നടപ്പും സംസാരവുമൊക്കെ സത്യനെപ്പോലെയായി.സിനിമാനടനാകണമെന്ന മോഹം ആദ്യം പറഞ്ഞത് അപ്പനോട്. അപ്പൻ മകനെ അവന്റെ ഇഷ്ടത്തിന് വിടുകയും ചെയ്തു. നിങ്ങളിതെന്താ കാണിക്കുന്നത്. മകനെയൊന്ന് ഉപദേശിച്ചുകൂടേ എന്ന് അമ്മയുൾപ്പെടെ നാട്ടിലെല്ലാവരും അപ്പനോട് ചോദിച്ചിരുന്നു. എട്ടുമക്കളിൽ ഒന്നൊഴിച്ച് എല്ലാം നന്നായി പഠിക്കുന്നുണ്ടല്ലോ. ഒന്ന് ഇങ്ങനെ മതീന്ന് കർത്താവ് കരുതിക്കാണും എന്ന മറുപടിയായിരുന്നു അപ്പന്റേത്.