വീട്ടുജോലിക്കാർക്കും  അവകാശങ്ങളുണ്ട്

വീട്ടുജോലിക്കാരെ ഏജൻസികളും തൊഴിലുടമകളും ചൂഷണംചെയ്യുന്നത് തടയുകയെന്നതാണ് ഡൊമസ്റ്റിക് വർക്കേഴ്‌സ്(റെഗുലേഷൻ ആൻഡ് വെൽഫയർ) ആക്ട് എന്ന കരടുബിൽ ലക്ഷ്യമിടുന്നത്. കൃത്യമായ രജിസ്‌ട്രേഷൻ നടപടികൾ പാലിക്കാതെ പ്രവർത്തിക്കുന്ന ഏജൻസികളെ ബില്ലുപ്രകാരം നിലവിൽവരുന്ന ക്ഷേമബോർഡിന്റെ പരിധിയിൽ കൊണ്ടുവരുന്നതോടെ ഈ രംഗത്തെ ചൂഷണം ഒരു പരിധിവരെ ഇല്ലാതാവും. ഹോം നഴ്‌സുമാരായും വീട്ടുജോലിക്കാരായും ജോലിചെയ്യുന്ന സ്ത്രീകളുടെ വേതനത്തിൽനിന്ന് നല്ലൊരുശതമാനം തുക ഏജൻസികൾ കവർന്നെടുക്കാറുണ്ട്. തുടർന്നു ജോലികിട്ടാനുള്ള സാധ്യത ഇല്ലാതാവുമെന്ന ഭയത്താൽ പലരും ഇതംഗീകരിച്ചുകൊടുക്കാൻ നിർബന്ധിതരാവുന്നു. ഇനിമുതൽ തങ്ങൾക്കു കീഴിലുള്ള ജീവനക്കാർക്ക് സുരക്ഷിതമായ തൊഴിൽ അന്തരീക്ഷമൊരുക്കാനും ഏജൻസികൾ ബാധ്യസ്ഥരാവും. തൊഴിൽസമയം, അവധി, ആനുകൂല്യം, വിശ്രമസൗകര്യം തുടങ്ങിയവയൊക്കെ തൊഴിൽക്കരാറിൽ വ്യവസ്ഥചെയ്യണം. അതേസമയം, ഈ ഏജൻസികളുടെ പ്രവർത്തനങ്ങൾ സ്ഥിരമായി നിരീക്ഷിക്കുന്നതിനായുള്ള സംവിധാനങ്ങളുണ്ടാവേണ്ടതുണ്ട്.

ജോലിചെയ്യുന്ന വീടുകളിൽനിന്ന് മാനസികാധിക്ഷേപങ്ങളും ശാരീരിക പീഡനങ്ങളുംവരെ ഏറ്റുവാങ്ങേണ്ടിവരുന്ന ജോലിക്കാർ ഏറെയുണ്ട്. സഹജീവിയെന്ന പരിഗണനപോലും നൽകാതെ അതികഠിനമായ ജോലികൾ ചെയ്യിക്കുന്നതും പതിവാണ്. പലപ്പോഴും കുടുംബത്തിന്റെ അത്താണികളായ സ്ത്രീകളാണ് ഈ തൊഴിൽമേഖലയിലേക്കുവരുന്നതെന്നതിനാലാണ് പലരും നിശ്ശബ്ദം സഹിച്ചുപോരുന്നത്. അസംഘടിത വിഭാഗമെന്ന നിലയിൽ തൊഴിലാളി യൂണിയനുകൾപോലും ഇവരുടെ പ്രശ്നങ്ങൾ ഉന്നയിക്കാനോ പരിഹരിക്കാനോ മുന്നോട്ടുവരാറില്ല. തൊഴിൽ പരിരക്ഷാ നിയമങ്ങളുടെ പിന്തുണയോടെ പരാതിപരിഹാരസംവിധാനമുണ്ടാവുന്നു എന്നത് ഈ പശ്ചാത്തലത്തിൽ പ്രധാനമാണ്. ഏജൻസിയോ തൊഴിലുടമയോ ഒരു സുപ്രഭാതത്തിൽ ഇറക്കിവിടുന്ന നിലവിലുള്ള സാഹചര്യത്തിന് ഇനി മാറ്റംവരും. അസിസ്റ്റന്റ് ലേബർ ഓഫീസറിൽ കുറയാത്ത ഉദ്യോഗസ്ഥൻ ഇനി ഇവരുടെ പരാതി കേൾക്കാനുണ്ടാകും. തർക്കപരിഹാര കൗൺസിലും നിലവിൽവരും.

വിദ്യാഭ്യാസമോ സുരക്ഷിതത്വമോ തടസ്സപ്പെടുത്തരുത്, അനുവാദമില്ലാതെ മറ്റ് ജോലികൾ ചെയ്യിക്കരുത് തുടങ്ങി തൊഴിലാളിയെന്ന നിലയിലുള്ള ഒട്ടേറെ അവകാശങ്ങൾ ബിൽ ഉറപ്പുവരുത്തുന്നുണ്ട്. അതേസമയം, നിയമനിർമാണത്തിനപ്പുറം ഇവ നടപ്പാക്കാൻ എത്രമാത്രം ആത്മാർഥത അധികൃതർ കാണിക്കുമെന്നത് കാത്തിരുന്നുതന്നെ കാണണം. തങ്ങളുടെ സംരക്ഷണത്തിനായി ഇത്തരമൊരു നിയമമുണ്ട് എന്നുപോലും അറിയാനിടയില്ലാത്ത ഒട്ടേറെപ്പേർ വീട്ടുജോലിക്കാരായുണ്ടെന്ന വസ്തുത സർക്കാർ കാണേണ്ടതുണ്ട്. ഇവരെയെല്ലാം ക്ഷേമനിധി ബോർഡിനുകീഴിൽ രജിസ്റ്റർ ചെയ്യിക്കാനും നിയമസംരക്ഷണമൊരുക്കാനും അധികൃതർ മുൻകൈയെടുക്കണം. സ്വകാര്യമേഖലയിലെ ചൂഷണമൊഴിവാക്കാൻ തദ്ദേശ സ്വയംഭരണ സ്ഥാപനങ്ങൾക്കും കുടുംബശ്രീപോലുള്ള കൂട്ടായ്മകൾക്കും വീട്ടുജോലിക്കാരെ ഒരു കുടക്കീഴിൽ കൊണ്ടുവരാൻ കഴിയും. ഹോം നഴ്‌സിങ്, വീട്ടുജോലി തുടങ്ങിയ ജോലികൾ വിദേശരാജ്യങ്ങളിലെന്നപോലെ ഇവിടെയും ആത്മാഭിമാനത്തോടെ ചെയ്യാനുള്ള സാഹചര്യമുണ്ടാക്കിയാൽ വലിയതൊഴിലവസരമായി ഇൗ മേഖലയെ മാറ്റിയെടുക്കാം. അതിലേക്കുള്ള ആദ്യ ചുവടുവെപ്പായി പുതിയ ബിൽ മാറുമെന്നു പ്രതീക്ഷിക്കാം.