വേറിട്ട ശബ്ദങ്ങൾ, കേട്ടിട്ടില്ലാത്ത നാദങ്ങൾ

ലോകം ഒരു മഹാമാരിയിൽനിന്ന്‌ കുടഞ്ഞെഴുന്നേറ്റ് മുന്നോട്ടുപോകുന്നതിന്റെ ഉത്സവമാണത്, ഉത്സാഹമാണ്. കേരളത്തിലേക്ക് വിശ്വസാഹിത്യത്തിലെ പ്രതിഭകളെ കൊണ്ടുവരാനും അവരുടെ ചിന്തകളെ കേൾപ്പിക്കാനും അക്ഷരോത്സവത്തിന്റെ ഓരോ പതിപ്പിലും ശ്രമിക്കാറുണ്ട്. ഇത്തവണ വരുന്നത്, കഴിഞ്ഞവർഷം നൊബേൽ സമ്മാനം നേടിയ ടാൻസാനിയൻ-ബ്രിട്ടീഷ് എഴുത്തുകാരൻ അബ്ദുൾറസാഖ് ഗുർണയാണ്. അഭയവാസത്തെയും അതിജീവനത്തിന്റെ സങ്കീണതകളെക്കുറിച്ചും ഇത്രയ്ക്ക്‌ ആഴത്തിലും ഭംഗിയായും എഴുതിയിട്ടുള്ളവർ ചുരുക്കമാണ്. ഇന്ത്യൻ മഹാസമുദ്രത്തിലെ വാണിജ്യ-സാംസ്കാരിക യാത്രകളെക്കുറിച്ച് പഠിക്കുകയും എഴുതുകയും ചെയ്ത ഗുർണയുടെ കേരളത്തിലേക്കുള്ള ആദ്യസന്ദർശനവും ഇതാണ്. ഈ വർഷത്തെ ബുക്കർ സമ്മാനജേതാവ് ഷെഹാൻ കരുണതിലക ഇതിനുമുമ്പും അക്ഷരോത്സവത്തിൽ പങ്കെടുത്തിട്ടുണ്ട്. എന്നാൽ, ഇക്കുറി ലോകസാഹിത്യത്തിന്റെ മിന്നുന്ന താരമായാണ് വരവ്. തന്റെ സെവൻ മൂൺസ് ഓഫ് മാലി അൽമേഡയിലൂടെ ശ്രീലങ്കൻ ആഭ്യന്തരകലാപത്തിന്റെ കഥപറയുന്ന ഷെഹാൻ, കനകക്കുന്നിൽ തന്റെ യാത്രയുടെ കഥപറയും. ഇന്റർനാഷണൽ ബുക്കർ ജേതാവായ ഒമാനി എഴുത്തുകാരി ജോക്ക അൽ ഹാർത്തിക്കും കേരളം ആദ്യാനുഭവമായിരിക്കും. ഫിക്‌ഷൻ എങ്ങനെ സ്ത്രീശാക്തീകരണത്തിനു കാരണമാകും എന്ന് അവർ പറയും.

കാലാവസ്ഥാവ്യതിയാനത്തെക്കുറിച്ച് എഴുതുന്ന ഇന്ത്യക്കാരിൽ പ്രമുഖനാണ് ജ്ഞാനപീഠജേതാവായ അമിതാവ് ഘോഷ്. വർഷങ്ങൾക്കുമുമ്പ് താൻ ജോലിചെയ്തിരുന്ന തിരുവനന്തപുരത്തേക്കുള്ള ഒരു നൊസ്റ്റാൾജിക് യാത്രയാകും ഘോഷിന് ഇത്തവണത്തെ അക്ഷരോത്സവം. പ്രകൃതി നേരിടുന്ന പ്രതിസന്ധിയിൽ എങ്ങനെ സാഹിത്യം അതിന്റെ പങ്കുവഹിക്കുന്നു എന്ന് അദ്ദേഹം വിവരിക്കും.
സാഹിത്യം ജീവിതത്തിന്റെ ആഖ്യാനമാകുന്നതിനാൽ, അത് എഴുത്ത് എന്ന പ്രക്രിയയിൽമാത്രം ഒതുങ്ങേണ്ടതല്ല. ‘MBIFL Inspirations’-ലൂടെ കനകക്കുന്നിലേക്കു വരുന്നത് സ്വന്തം ജീവിതംകൊണ്ട് അനേകായിരം ആൾക്കാരെ സ്പർശിച്ചവരാണ്. അതിൽ സൈക്കിൾ ദീദി, ബൈക്ക് ആംബുലൻസ് ദാദ, എവറസ്റ്റ് കീഴടക്കിയ ഏറ്റവും പ്രായംകുറഞ്ഞ പെൺകുട്ടി പൂർണ മലാവത്ത് എന്നിവരുൾപ്പെടും.
ഒരു സാഹിത്യോത്സവം എന്തായിരിക്കണം, എന്തിനായിരിക്കണം എന്ന ചിന്തയാണ് ഒരു ‘ക്യുറേറ്റഡ്’ ഫെസ്റ്റിവൽ എന്നതിലേക്കെത്തിച്ചത്. ജനപ്രിയ എഴുത്തുകാർമാത്രമല്ല, വേറിട്ട ശബ്ദങ്ങളും ഇവിടെ കേട്ടിട്ടില്ലാത്ത ശബ്ദങ്ങളും കേരളത്തിലേക്ക് കൊണ്ടുവരണം എന്നതാണ് ഒരു ലക്ഷ്യം. ശബ്ദകോലാഹലങ്ങളോ ജനക്കൂട്ടങ്ങളോ അല്ല പ്രാധാന്യം. മറിച്ച്, അർഥഗർഭമായ ആശയവിനിമയവും ചില അപൂർവസംഗമങ്ങളും പ്രചോദനാത്മകമായ പ്രസംഗങ്ങളുമൊക്കെയാണ്. അക്ഷരോത്സവത്തിൽ ഇത്തവണ ഇന്ത്യൻ എഴുത്തുകാർക്കുപുറമേ ലാറ്റിൻ അമേരിക്കൻ, ഏഷ്യൻ (ഫിലിപ്പീൻസ്, കൊറിയ, മലേഷ്യ), ആഫ്രിക്കൻ, മദ്ധ്യ-കിഴക്കൻ യൂറോപ്പ്, ഓസ്‌ട്രേലിയ എന്നിവിടങ്ങളിൽനിന്നുള്ള എഴുത്തുകാരുമുണ്ടാകും. കനകക്കുന്നിൽ ഇതുവരെ കേട്ടിട്ടില്ലാത്ത ശബ്ദങ്ങളും കഥകളും കേൾക്കും. ‘Reimagining India’ സീരീസിൽ രാഷ്ട്രീയക്കാരും എഴുത്തുകാരും തങ്ങളുടെ കാഴ്ചപ്പാടിലെ ഇന്ത്യയെക്കുറിച്ച് സംസാരിക്കും. കനകക്കുന്നിൽ ഇത്തവണ ഞങ്ങൾ ‘പോളണ്ടിനെക്കുറിച്ച് മിണ്ടും’ കാരണം, പതിനഞ്ചോളംവരുന്ന പോളിഷ് സാഹിത്യകാരന്മാരുടെ സംഗമംകൂടിയായിരിക്കും ഇത്തവണത്തെ അക്ഷരോത്സവം.