അബുദാബി: ഇന്ത്യയിൽനിന്ന് രണ്ടുഡോസ് വാക്സിനെടുത്തവർക്ക് യു.എ.ഇ.യിൽ നിന്നും ഇന്ത്യയിലേക്ക് യാത്രചെയ്യുന്നതിന് മുന്നോടിയായുള്ള പി.സി.ആർ. പരിശോധന ഒഴിവാക്കി എയർ ഇന്ത്യ എക്സ്പ്രസ്. യു.എ.ഇയിൽ നിന്ന് ഇന്ത്യയിലേക്ക് യാത്രചെയ്യുന്നവർക്കായി പുറത്തിറക്കിയ നിർദേശപത്രികയിലാണ് ഇക്കാര്യം വ്യക്തമാക്കിയിരിക്കുന്നത്.
ഇന്ത്യയിൽനിന്നും വാക്സിൻ രണ്ട് ഡോസ് എടുത്തവർക്ക് മാത്രമാണ് ഇളവെന്നും പ്രത്യേകം വ്യക്തമാക്കിയിട്ടുണ്ട്. ഇന്ത്യയിൽ നിന്നും വാക്സിനെടുത്ത യു.എ.ഇ. സന്ദർശകർക്ക് തീരുമാനം ഏറെ ഗുണകരമാകും. എന്നാൽ യാത്രയ്ക്ക് മുമ്പ് ’എയർ സുവിധ’ പോർട്ടലിൽ ഇന്ത്യയിൽനിന്ന് ലഭിച്ച വാക്സിൻ സർട്ടിഫിക്കറ്റ് അപ്‌ലോഡ് ചെയ്യണം. ഇന്ത്യയിലെത്തുന്നവർക്ക് ഏഴുദിവസത്തെ നിർബന്ധിത ക്വാറന്റീൻ ഒഴിവാക്കിക്കൊണ്ടുള്ള ഉത്തരവിന് പിന്നാലെയാണ് പുതിയ തീരുമാനം. യു.എ.ഇ.യിൽ നിന്ന് വാക്സിനെടുത്തവർ യാത്രയ്ക്ക് 72 മണിക്കൂറിനകം ലഭിച്ച പി.സി.ആർ.നെഗറ്റീവ് ഫലം സമർപ്പിക്കണമെന്ന തീരുമാനം നിലനിൽക്കുന്നുണ്ട്. ഇന്ത്യയിലേക്ക് പോകുന്നവർ എയർ സുവിധ പോർട്ടലിൽ കഴിഞ്ഞ 14 ദിവസത്തെ യാത്രാവിവരങ്ങൾ അടക്കമുള്ളവ സമർപ്പിക്കണം. വ്യവസ്ഥകൾ പാലിക്കാത്ത യാത്രികർക്ക് ബോർഡിങ് അനുവദിക്കില്ലെന്ന് എയർ ഇന്ത്യ എക്സ്പ്രസ് വ്യക്തമാക്കി.
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..