ബെംഗളൂരു : ഇന്റലിജൻസ് എ.ഡി.ജി.പി. ബി. ദയാനന്ദയെ ബെംഗളൂരു സിറ്റി പോലീസ് കമ്മിഷണറായി നിയമിച്ചു. നിലവിലെ സിറ്റി പോലീസ് കമ്മിഷണർ സി.എച്ച്. പ്രതാപറെഡ്ഡിക്ക് ആഭ്യന്തര സുരക്ഷാവിഭാഗം ഡി.ജി.പി.യായി നിയമനംനൽകി. ഇതുസംബന്ധിച്ച ഉത്തരവ് ചൊവ്വാഴ്ചയാണ് ആഭ്യന്തരവകുപ്പ് പുറത്തിറക്കിയത്.
ബെംഗളൂരു സിറ്റി ട്രാഫിക് സ്പെഷ്യൽ കമ്മിഷണർ എം.എ. സലീമിനും ഡി.ജി.പി.യായി സ്ഥാനക്കയറ്റം നൽകിയിട്ടുണ്ട്. സി.ഐ.ഡി. വിഭാഗത്തിന്റെയും സാമ്പത്തിക കുറ്റകൃത്യ വിഭാഗത്തിന്റെയും അധികച്ചുമതലയും അദ്ദേഹത്തിന് നൽകി. സി.ഐ.ഡി. വിഭാഗം എ.ഡി.ജി.പി. കെ.വി. ശരത് ചന്ദ്രയാണ് പുതിയ ഇന്റലിജൻസ് എ.ഡി.ജി.പി. സിദ്ധരാമയ്യ സർക്കാർ അധികാരത്തിലേറിയശേഷം നടപ്പാക്കുന്ന പോലീസ് ഉദ്യോഗസ്ഥരുടെ ആദ്യ പുനഃക്രമീകരണമാണിത്.
1994 ബാച്ച് ഐ.പി.എസ്. ഉദ്യോഗസ്ഥനാണ് സിറ്റി പോലീസ് കമ്മിഷണറായ ബി. ദയാനന്ദ. ഹവേരി ജില്ലയിലെ റാണെബെന്നൂർ സ്വദേശിയായ അദ്ദേഹം നേരത്തേ ബെംഗളൂരു ക്രൈം ആൻഡ് ട്രാഫിക് വിഭാഗം ജോയന്റ് കമ്മിഷണറായി സേവനമനുഷ്ടിച്ചിട്ടുണ്ട്. അഴിമതിക്കറ പുരളാത്ത ഉദ്യോഗസ്ഥനെന്നാണ് അദ്ദേഹം അറിയപ്പെടുന്നത്.
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..